News

Previous Next

ክቡር ሚኒስትር አቶ ገዱ ከግሎባል አሊያንስ ሊቀ-መንበር አቶ ታማኝ በየነ ጋር ተወያዩ

የውጭ ጉዳይ ሚኒስትር ክቡር አቶ ገዱ አንዳርጋቸው ከዓለም አቀፍ ትብብር ለኢትዮጵያውያን  (ግሎባል አሊያንስ) ሊቀ-መንበር አቶ ታማኝ በየነ ጋር ዛሬ ግንቦት 9 ቀን 2011 ዓ.ም ተወያይተዋል። 

ክቡር ሚኒስትሩ በዚሁ ወቅት እንዳሉት ግሎባል አሊያንስ የኢትዮጵያውያን መብት እንዲከበርና ችግር ሲደርስባቸውም ከጎናቸው በመሆን እያደረገ ላለው በጎ ተግባር አመስግነዋል።

መንግስት ከምንጊዜውም በላይ ዳያስፖራው በአገሪቱ ልማትና የዴሞክራሲ ስርዓት ግንባታ የራሱን አሻራ እንዲያሳርፍ ተቀራርቦ ለመስራት ቁርጠኛ መሆኑንም ተናግረዋል።

የውጭ ጉዳይ ሚኒስቴርና ተጠሪነቱ ለሚኒስቴሩ የሆነው የዳያስፖራ ኤጄንሲ ለግሎባል አሊያንስ ድጋፍ እንደሚያደርግም አስታውቀዋል።

በቅርቡም በጌዲዮ ለተፈናቀሉ ዜጎች ላደረገው ድጋፍና ወደ ቀያቸው ተመልሰው እንዲቋቋሙ ላሳየው አጋርነት አመስግነዋል።

የግሎባል አሊያንስ ሊቀ-መንበር አቶ ታማኝ በየነ በበኩላቸው ማህበሩ ከተቋቋመበት ጊዜ ጀምሮ የኢትዮጵያውያን መብት እንዲከበርና አደጋ ሲደርስባቸውም እርዳታ ሲያደርግ መቆየቱን ገልጸዋል።

ከዚህም ባሻገር በውጭ አገራት የሚኖሩ ኢትዮጵያውያንና ትውልድ ኢትዮጵያውያን ከአገራቸው ጋር ያላቸው ቁርኝት እንዲቀጥል እየሰራ እንደሚገኝም ገልጸዋል።

ከዚህም ባሻገር በጎ ፈቃደኛ የዳያስፖራ አባላትን በማሰባሰብ ወደ ኢትዮጵያ መጥተው በሙያቸው የድጋፍና የስልጠና እገዛ እንዲሰጡ እያደረገ መሆኑን ተናግረዋል።

የአሊያንሱ የቦርድ አባል አቶ በትሩ ገ/እግዚያብሔር በበኩላቸው በቀጣይም የአሊያንሱን እንቅስቃሴ በማስፋት በተቋማት የአቅም ግንባታና በዴሞክራሲ ማጎልበት ስራዎች ለመሳተፍ መታቀዱን አስታውቀዋል።