News

Previous Next

የኢትዮጵያ ዳያስፖራ ኤጀንሲ በደቡብ አፍሪካ ከሚኖሩ ኢትዮጵያውያንና ትውልደ ኢትዮጵያውያን ጋር ተወያየ።

የኢትዮጵያ ዳያስፖራ ኤጀንሲ በደቡብ አፍሪካ ከሚኖሩ ኢትዮጵያውያንና ትውልደ ኢትዮጵያውያን ጋር ተወያየ።

አዲስ አበባ ፣ ሚያዚያ 28 ፣ 2011 (ኤፍ ቢ ሲ) የኢትዮጵያ ዳያስፖራ ኤጀንሲ በደቡብ አፍሪካ ከሚኖሩ ኢትዮጵያውያንና ትውልደ ኢትዮጵያውያን ጋር ተወያየ።

በውይይት መድረኩ ላይ ስለ ኤጀንሲው አሰራር ጥናታዊ ጽሁፍ ቀርቦ ውይይት ተካሂዷል።

ጥናቱን ያቀረቡት የኤጀንሲው ምክትል ዳይሬክተር አቶ መሐመድ እድሪስ ከዳያስፖራው የሚገኙ የዕውቀት፣ የክህሎት እና የቴክኖሎጂ ሽግግር የኤጀንሲው ትኩረት መሆኑን ገልጸዋል።

ምክትል ዳይሬክተሩ በውጭ የሚኖሩ ኢትዮጵያውያንን አቅም መጠቀም በሚቻልበት አግባብ አለመሰራቱን ጠቅሰው፥ ይህንን ለማሻሻልም ከዳያስፖራው ማህበረሰብ ጋር በመሆን ይሰራል ብለዋል።

የኤጀንሲው ዳይሬክተር ወይዘሮ ሰላማዊት ዳዊት በበኩላቸው፥ በውጭ የሚኖሩ ኢትዮጵያውያንን መብት እና ጥቅም ለማስጠበቅ የሚረዱ ስራዎችን ኤጀነሲው እየሰራ መሆኑን ተናግረዋል።

ኤጀንሲው አሁን ላይ በሃገሪቱ እየታየ ያለውን የተሻለ የፖለቲካ ሁኔታ በመጠቀም፥ ዳያስፖራው በማንኛውም ጉዳይ ላይ ተሳታፊ ይሆን ዘንድ በሚያስችል አግባብ መደራጀቱንም ጠቅሰዋል።

ተሳታፊዎች በበኩላቸው በስደት ባሉበት ሃገር ወቅቱን እየጠበቀ ከሚቀሰቀስ ጥቃት ራሳቸውን ለመጠበቅ መረጃ እንደማይደርሳቸው አንስተዋል።

ከዚህ ጋር ተያይዞም ዜጎች መብትና ግዴታቸውን እንዲያውቁ የማድረግ ስራ በኤምባሲው በኩል መሰራት አለበት ነው ያሉት።

በአገልግሎት ተቋማት ያለው የተንዛዛ አሰራር፣ ሙስና እና በወዳጅ ዘመድ የመጠቃቀም አካሔድ በሃገራቸው መዋዕለ ንዋያቸውን እንዳያፈሱ እንዳደረጋቸውም ጠቁመዋል።

ኤጀንሲውም ችግሩን ለመቅረፍ በደቡብ አፍሪካ በርካታ ቁጥር ያለው ዳያስፖራ በመኖሩ፥ የኢትዮጵያ በአፍሪካ የዳያስፖራ ማስተባበሪያን በደቡብ አፍሪካን ማድረጉን አስታውቋል።