News

Previous Next

ለታላቁ የኢትዮጵያ ህዳሴ ግድብ ከዳያስፖራው ሃብት የሚሰባሰብበት መንገድ ይበልጥ ውጤታማ እንዲሆን በሚያስችሉ አሰራሮች ዙሪያ ውይይት ተካሄደ

የኢትዮጵያ ዳያስፖራ ኤጀንሲ ለታላቁ የኢትዮጵያ ህዳሴ ግድብ ከዳያስፖራው ሃብት የሚሰባሰብበት መንገድ ይበልጥ ውጤታማ እንዲሆን በሚያስችሉ አሰራሮች ዙሪያ ከኢትዮጵያ ንግድ ባንክ፣ ከታላቁ የህዳሴ ግድብ ግንባታ ህዝባዊ ተሳትፎ አስተባባሪ ብሔራዊ ም/ቤት ጽ/ቤት እንዲሁም ከኢትዮጵያ ኤሌክትሪክ አገልግሎት ከተወከሉ አካላት ጋር ተወያየ።
ውይይቱን የከፈቱት የኤጀንሲው ም/ዋና ዳይሬክተር አቶ መሐመድ እንድሪስ ባስተላለፉት መልዕክት መድረኩ ለታላቁ የኢትዮጵያ ህዳሴ ግድብ ከዳያስፖራው ሃብት ለማሰባሰብ የተዘረጉ አሰራሮች ይበልጥ ውጤታማ መሆን የሚችሉበትን መንገድ በመለየት የውሳኔ ሃሳቦችን ለማመንጨት ታስቦ የተዘጋጀ መሆኑን ገልጸው፣ ተሳታፊዎች ከጉዳዩ ጋር በተያያዘ በየተቋማቸው ያሉ ተሞክሮዎችን እንዲያቀርቡ ጋብዘዋል።
በዚህም መሰረት በኢትዮጵያ ንግድ ባንክ የዳያስፖራ ቅርንጫፍ ስ/አስኪያጅ አቶ ለማ ዋቀዮ ባንካቸው ለታላቁ የኢትዮጵያ ህዳሴ ግድብ በውጭ ምንዛሪ ቦንድ የሚሸጥበትን መንገድ አብራርተዋል። ተሳታፊዎችም ከቦንድ ሽያጭ ጋር በተያያዘ በዳያስፖራውና በሚሲዮኖች የሚቀርቡ ተደጋጋሚ ጥያቄዎችን አንስተዋል። ከነዚህም መካከል ቦንድ መሸጥ በተከለከለባቸው ሃገራት አማራጭ የሃብት ማሰባሰቢያ ስልቶችን ስለማመቻቸት፣ በስዊፍት ቦንድ ለገዙ የዳያስፖራ አባላት የገዙት ቦንድ እንዲደርሳቸው ስለሚደረግበት መንገድ፣ የጊዜ ገደባቸው የተጠናቀቀ ቦንዶች ክፍያ ስለሚፈጸምበት እንዲሁም ዳያስፖራው ተጨማሪ ቦንዶችን መግዛት የሚችልባቸው ሁኔታዎችን ማመቻቸት የሚሉት ይጠቀሳሉ።
በመጨረሻም በቦንድ አማካኝነት ከዳያስፖራው ለታላቁ የኢትዮጵያ ህዳሴ ግድብ ሃብት የማሰባሰብ ሂደቱን ይበልጥ ውጤታማ ለማድረግና በውይይቱ ላይ የተነሱ ሃሳቦች ምላሽ እንዲያገኙ ከኢትዮጵያ ብሔራዊ ባንክና ከሌሎች ባለድርሻ አካላት ጋር በትብብር መሰራት እንዳለበት አቅጣጫ ተቀምጧል።