News

Previous Next

የኢትዮጵያ ዳያስፖራ ኤጀንሲ የ2012 በጀት ዓመት የእቅድ ክንውን ሪፖርቱን በዓመታዊ የአምባሳደሮች ጉባኤ ላይ አቀረበ

በቢሾፍቱ ኩሪፍቱ ሆቴል እየተካሄደ በሚገኘው ዓመታዊ የአምባሳደሮች ጉባኤ ላይ የኢትዮጵያ ዳያስፖራ ኤጀንሲ የ2012 በጀት አመት የእቅድ ክንውን ሪፖርቱን አቀረበ።
በሪፖርቱ በበጀት አመቱ የዳያስፖራ ጉዳዮችና የዜጋ ተኮር ዲፕሎማሲን ለመተግበር በኤጀንሲውና በሚሲዮኖች የተከናወኑ አበይት ተግባራት ላይ ገለጻ የተደረገ ሲሆን፣ በዳያስፖራ ተሳትፎ በሀገር ቤት የተገኙ ውጤቶችም በዝርዝር ቀርበዋል።
ከተከናወኑ ዋና ዋና ተግባራት መካከልም ከ2.5 ቢለዮን ብር በላይ ካፒታል ላስመዘገቡና በንድግ፣ ኢንቨስትመንትና ቱሪዝም ስራ ላይ ለመሳተፍ ለጠየቁ የዳያስፖራ አባላት ድጋፍ መደረጉ፣ በዳያስፖራ አባላት አማካኝነት ወደ ሶስት ሺህ ለሚጠጉ ሰዎች በልዩ ልዩ ዘርፎች የአቅም ግንባታ ስልጠናዎች መሰጠታቸው፣ 12661 የዳያስፖራ አባላት የውጭ ምንዛሪ አካውንት መክፈታቸውና ከ19 ሚሊዮን ዶላር በላይ ተቀማጭ ማድረጋቸው፣ በበጀት ዓመቱ በዳያስፖራው ከ3.7 ቢሊዮን ዶላር በላይ መላኩ፣ በበጎ አድራጎት ተግባራት ላይ የተሳተፉ 44 የዳያስፖራ ማህበራትና ሙያ ተኮር በጎ አድራጎት ድርጅቶችን ማስተባበርና መደገፍ መቻሉ፣ ለታላቁ የኢትዮጵያ ህዳሴ ግድብ ግንባታና ለኮሮና ቫይረስ መከላከያ ከዳያስፖራው ከፍተኛ መጠን ያለው ሃብትና ሙያዊ ድጋፍ መገኘቱ እንዲሁም በመ/ምስራቅና በአፍሪካ ያሉ ዜጎች ችግር በሚገጥማቸው ግዜ ከሚመለካቸው አካላት ጋር በመሆን የህግ ከለላ በመስጠት ችግሩን ለመፍታት መስራቱ የሚሉት ይገኙበታል፡፡
በተለይም ዳያስፖራው ታላቁ የኢትዮጵያ ህዳሴ ግድብ ግንባታን በዕውቅት፣ በገንዘብና በፐብሊክ ዲፕሎማሲ ስራ እንዲደግፍ የተከናወኑ ተግባራት እንዲሁም የኮሮና ወረርሽኝን ለመከላከል የተከናወኑ የሃብት ማሰባሰብና የሙያ ድጋፎች አመርቂ ውጤት ማምጣት እንደቻሉ ተመልክቷል።
በመጨረሻም በአፈፃፀማቸው የተሻለ ውጤት ያመጡ ሚሲዮኖች ተግባራት ለተሞክሮ በሚሆን መልኩ ቀርበው ውይይት የተደረገባቸው ሲሆን፣ ለተነሱ ጥያቄዎችም በኤጀንሲው አመራሮች ምላሽ ተሰጥቷል።