News

Previous Next

የዳያስፖራ ምሁራን በታላቁ የኢትዮጵያ ህዳሴ ግድብ ላይ የዓለም አቀፉን ማህበረሰብ አመለካከት ለመቀየር እየሰሩ መሆኑ ተገለጸ

በአሜሪካንና በእንግሊዝ ሃገር የሚኖሩ የዳያስፖራ ምሁራን በታላቁ የኢትዮጵያ ህዳሴ ግድብ ላይ የዓለም አቀፉን ማህበረሰብ አመለካከት ለመቀየር እየሰሩ መሆኑ ተገለጸ፡፡

ምሁራኑ ከፋና ብሮድካስቲንግ ኮርፖሬት ጋር በነበራቸው ቆይታ ኢትዮጵያ በታላቁ የህዳሴ ግድብ ላይ ያላትን ግልጽ አቋም ለዓለም በማስረዳት ግብጾች በአባይ ወንዝ አጠቃቀም ላይ እያራመዱ ያሉትን የተሳሳተና ዘመናትን ያስቆጠረ አመለካከት ለመቀየር እየሰሩ መሆኑን አስረድተዋል፡፡

ምሁራኑ አክለውም ግብጽ በታላቁ የህዳሴ ግድብ ላይ የምታራምደው ተለዋዋጭ አቋም በማንኛውም መስፈርት ተቀባይነት የሌለው እንደሆነ ገልጸዋል፡፡

ከዚህም ጋር በተያያዘ በአሜሪካ የሚኖሩትና የኢኮኖሚክስ ባለሙያ የሆኑት ፕሮፌሰር ተሾመ አበበ ከታላቁ የህዳሴ ግድብ ጋር የተያያዙ ጽሑፎችን በልዩ ልዩ ሕትመቶች ላይ በማውጣት የኢትዮጵያን የፍትሐዊ ተጠቃሚነት መርህ በስፋት ማስረዳታቸውን ገልጸዋል፡፡

በለንደን የግጭት አፈታት ተመራማሪ የሆኑት ዶ/ር ልኡልሰገድ አበበም በዓለም አቀፍ ደረጃ በተበተነው ጽሑፋቸው የአባይ ወንዝ ለግብጻውያን ባደላ መልኩ ጥቅም ላይ የሚውልበት ጊዜ እንደማይቀጥል ገልጸው፣ ይልቁንም ወንዙ የተፋሰሱ ሃገራት የጋራ ሃብት እንደመሆኑ መጠን ሁሉም የተፋሰሱ ሃገራት በፍትሓዊነት ሊጠቀሙበት እንደሚገባ ሞግተዋል፡፡ ምሁሩ በጽሑፋቸው ኢትዮጵያ የምታራምደውን የፍትሐዊ ተጠቃሚነት መርህ በአጽንኦት ከማስረዳታቸውም በላይ ግብጾች በአባይ ወንዝ ላይ የሚያራምዱትን ኢፍትሐዊ አቋም ዳግም እንዲያስቡበት ሱዳኖችም አቋማቸውን ዳግም እንዲመረምሩት ጠይቀዋል ሲል የዘገበው ፋና ብሮድካስቲንግ ኮርፖሬት ነው፡፡