News

Previous Next

ጠቅላይ ሚኒስትር ዶ/ር አብይ አሕመድ የሰላም ኖቤል አሸናፊ በመሆናቸው የደስታ መግለጫ ዝግጅቶች ተካሄዱ

ከዚህም ጋር በተያያዘ በኖርዌይ ኦስሎ የሚገኙ ኢትዮጵያዊያን ጠቅላይ ሚኒስትር ዶ/ር አብይ አህመድ የኖቤል ሽልማትን በማግኘታቸው የተሰማቸውን ደስታ ለሊቱን ሲገልጹ ማደራቸውን መገናኛ ብዙሃን ዘገቡ፡፡

ኢትዮጵያዊያኑ ጠቅላይ ሚኒስትር ዶ/ር አቢይ ባረፉበት ግራንድ ሆቴል ተገኝተው ነው ደስታቸውን ሲገልጹ የነበሩት፡፡ ጠቅላይ ሚኒስትር ዶ/ር አቢይም ደስታቸውን ለመግለፅ በሆቴሉ ለተገኙ ኢትዮጵያዊያን ምስጋና እና ሰላምታ አቅርበዋል፡፡ መረጃዎች እንደሚያመለክቱት ለጠቅላይ ሚኒስትሩ የኖቤል እጩነት ፊርማ ከማሰባሰብ ጀምሮ እስካሁን ድረስ ከዳያስፖራው ከፍተኛ ድጋፍ በመደረግ ላይ ይገኛል።

ጠቅላይ ሚኒስትሩም በሁነቱ የተፈጠረውን ስሜት በፌስቡክ ገጻቸው ሲገልጹ፣ “ኦስሎ የኢትዮጵያ ዋና ከተማ እስክትመስል ድረስ በኢትዮጵያ ሰንደቅ ዓላማና በኢትዮጵያ ባነሮች ተውባ ሰነበተች፡፡ ሚዲያዎች ሁሉ ስለ ኢትዮጵያ በኩራት መሰከሩ፡፡” ብለዋል።

ዶክተር አቢይ የኖቤል የሰላም ሽልማትን በኦስሎ በተካሄደ ስነ ስርዓት በሚቀበሉበት ወቅት ባደረጉት ንግግር “ሰላም እንደ ዛፍ ችግኝ ነው፤ ችግኝን ተክሎ ለማሳደግ እንክብካቤ እንደሚያስፈልገው ሁሉ፣ ሰላምም ጥሩ ልብ እና እንክብካቤ ያስፈልገዋል” ማለታቸው የሚታወስ ነው፡፡

በተያያዘ ዜና የጠቅላይ ሚኒስትሩን የኖቤል ሽልማት አስመልክቶ በአሜሪካ የኢትዮጵያ ኤምባሲ የውጭ ጉዳይ ሚኒስትር አቶ ገዱ አንዳርጋቸው፣ የሃይማኖትና የማህበረሰብ ተወካዮች የተገኙበት ዝግጅት ተካሂዷል። በወቅቱም የውጭ ጉዳይ ሚንስትሩ አቶ ገዱ አንዳርጋቸው የኖቤል ሽልማቱን አስመልክቶ ባስተላለፉት መልዕክት ሽልማቱ ጠቅላይ ሚኒስትራችን ለሰላም ባሳዩት ቁርጠኝነት የተገኘና እውቅናውም ለመላው ኢትዮጵያዊያን የተሰጠ መሆኑን ገልጸው፣ እያንዳንዱ ኢትዮጵያዊ ለሰላም ዘብ እንዲቆምና በሚችለው ሙያ ሁሉ ሃገሩን እንዲደግፍ አሳስበዋል። በአሜሪካ የኢትዮጵያ ባለሙሉ ስልጣን አምባሳደር ፍፁም አረጋ በበኩላቸው፥ የኖቤል ሽልማቱ እስካሁን ከተመዘገቡ ድሎች ባሻገር በቀጣይ ከዚህ ለላቀ ስኬት ለመስራት የሚያግዝ ስንቅ ነው ብለዋል። የኢትዮጵያ ዓለም አቀፍ ዳያስፖራ ትረስት ፈንድ አመራሮች በመላው ዓለም የሚገኙ የዳያስፖራ አባላት የሚያደርጉትን ድጋፍ እንዲያጠናክሩም ጥሪ አቅርበዋል።

ጠቅላይ ሚኒስትሩ በነገው ዕለት አዲስ አበባ ሲገቡ የጀግና አቀባበል እንደሚደረግላቸው ለማወቅ ተችሏል።