News

Previous Next

የኢትዮጵያ ንግድ ባንክ በውጭ አገር ለሚኖሩ ኢትዮጵያውያን ልዩ አገልግሎት የሚሰጥ ቅርንጫፍ ከፈተ

የኢትዮጵያ ንግድ ባንክ በውጭ ሃገር ለሚኖሩ ኢትዮጵያውያንና ትውልደ ኢትዮጵያውያን ልዩ አገልግሎት የሚሰጥ የመጀመሪያ ቅርንጫፉን በአዲስ አበባ ከፈተ፡፡ በቅርንጫፍ አከፋፈት ስነ-ስርዓቱ ላይ የተገኙት የኢትዮጵያ ዳያስፖራ ኤጀንሲ ዋና ዳይሬክተር ወ/ሮ ሰላማዊት ዳዊት ለዳያስፖራ የሚሆን ባንክ ቅርንጫፍ መከፈቱ ዳያስፖራው በሀገር ውስጥ የሚያከናውናቸው የኢንቨስትመንት፣የንግድና ሌሎች የገንዘብ እንቅስቃሴዎች እንዲሳለጡ ከፍተኛ ድጋፍ የሚያደርግ ከመሆኑም በላይ በፋይናንስ መስክ ያለውን የዳያስፖራ እንቅስቃሴ አስመልክቶ መረጃዎች ከአንድ ቦታ እንዲገኙ የሚያደርግ በመሆኑ ጠቀሜታው የጎላ ነው ብለዋል። ዋና ዳይሬክተሯ አክለውም፣ የኢትዮጵያ ንግድ ባንክ ለዳያስፖራ ጉዳይ ትኩረት ሰጥቶ አገልግሎቱን ማቀላጠፍ እንዲቻል ስራው በአንድ ማዕከል እንዲሰራ ማድረጉ የሚያስመሰግነው መሆኑንም ገልጸዋል። በንግግራቸው ማጠቃለያም የኢትዮጵያ ዳያስፖራ ማህበረሰብ አባላት በተፈጠረው ዕድል ተጠቃሚ እንዲሆኑ ጥሪ አቅርበዋል።

ቅርንጫፉ በውጭ ሃገር የሚኖሩ ኢትዮጵያውያንና ትውልደ ኢትዮጵያውያን ወደ ትውልድ ሃገራቸው በመጡ ጊዜ የቁጠባ ሂሳብ በመክፈት ተጠቃሚ እንዲሆኑ ቅድሚያ ሰጥቶ የሚያስተናግድ ሲሆን፣ በአካል መቅረብ ለማይችሉትም በሚኖሩበት ሃገር አቅራቢያ በሚገኝ የኢትዮጵያ ኢምባሲ እና ቆንጽላ ፅህፈት ቤት አማካኝነት የባንክ ሂሳቡን መክፈት ያስችላል ተብሏል።