News

Previous Next

በደቡብ አፍሪካ የሚኖሩ ኢትዮጵያዊያንን ወቅታዊ ሁኔታ በተመለከተ የተሰጠ መግለጫ

የኢፌዲሪ የውጭ ጉዳይ ሚኒስቴር ኢትዮጵያዊያንን ጨምሮ በደቡብ አፍሪካ በሚኖሩ የሌሎች የአፍሪካ አገራት ዜጎችን ኢላማ ባደረገ መልኩ የተፈጸመውን ጥቃትና የንብረት ዝርፊያ በፅኑ ያወግዛል።

የደቡብ አፍሪካ ፕሬዝዳንት ክቡር ሰርል ራሞፎሳ ድርጊቱን በማውገዝ በጉዳዩ ላይ የተሳተፉ አካላትን በቁጥጥር ስር በማዋል ለህግ እንደሚያቀርቡ የገቡት ቃል አበረታች በመሆኑ መ/ቤታችን አድናቆቱን ይገልጻል። ክቡር ፕሬዝዳንቱ በገቡት ቃል መሰረትም በድርጊቱ የተሳተፉ አካላትን ለህግ እንደሚያቀርቡ መ/ቤታችን ያምናል።

በዚህ አጋጣሚ በየደረጃው የሚገኙ የደቡብ አፍሪካ ባለስልጣናት ጠንካራ ክትትል በማድረግ በድርጊቱ የተሳተፉ አካላትን በቁጥጥር ስር እንዲያውሉና ለህግ እንዲያቀርቡ እንዲሁም በደቡብ አፍሪካ የሚኖሩ ዜጎቻችን ደህንነት እንዲጠበቅ አስፈላጊውን ሁሉ እንዲያደርጉ ሚኒስቴር መ/ቤታችን ጥሪውን ያቀርባል።

በደቡብ አፍሪካ የሚገኘው የኢፌዲሪ ኤምባሲም ከሚመለከታቸው የአገሪቱ ባለስልጣናት እና ከኢትዮጵያ ኮሚኒቲ ጋር ሁኔታውን ለማረጋጋት በቅርበትና በትብብር እየሰራ መሆኑንና በደቡብ አፍሪካ የሚገኙ ኢትዮጵያውያን ዜጎችን ደህንነት ለማስጠበቅ የሚያደርገውን ክትትል አጠናክሮ እንደሚቀጥል ይገልጻል።