News

Previous Next

ሁለተኛ ትውልድ የኢትዮጵያ ዳያስፖራ ማህበረሰብ አባላት ልጆችና አበረታች  ተስፋቸው

ሁለተኛ ትውልድ የኢትዮጵያ ዳያስፖራ ማህበረሰብ አባላት ልጆች ውጤታማነትን ከአንደኛው ትውልድ የዳያስፖራ አባላት መስማት የተለመደ ጉዳይ ነው። ባለፈው ሳምንት በአፍሪካ ህብረት ተካሂዶ በነበረውና ’TASFA’ በተባለ የኢትዮጵያ ዳያስፖራ አባላት ቡድን በተዘጋጀው የዕውቀት ሽግግር ኮንፈረንስ ላይ ልምዳቸውን ያጋሩት የቡድን መሪው ዶ/ር ደረጀ ተሰማ እንዳሉት ሁለተኛ ትውልድ የኢትዪጵያ ዳያስፖራ አባላት ልጆች ውጤታማነት በከፍተኛ ደረጃ ላይ ይገኛል። በምሳሌነት የጠቀሱትም እሳቸው በሚኖሩበት ሞንትጎመሪ ካውንቲ በሚገኝ ት/ቤት ውስጥ ኢትዮጵያውያን የሁለተኛው ትውልድ ልጆች እያስመዘገቡት ያለውን ከፍተኛ ውጤት ነው። በእርሳቸው ዕምነት የወደፊቱን የአሜሪካ ጉዳይ ከሚወስኑ ሰዎች መካከል ሁለተኛው ትውልድ ኢትዮጵያውያን ወሳኝ ሚና ይኖራቸዋል።

የዶ/ር ደረጀን ምስክርነት ያነሳሁት በምክንያት ነው። ከአንድ ታዳጊ ወጣት ጋር ላስተዋውቃችሁ ስለፈለግሁ። ከልጁ ጋር የተገናኘነው በአትዮጵያ ዳያስፖራ ኤጀንሲ ቢሮ ውስጥ ነበር። አመጣጡም የህይወቱ አርአያ ካደረጋቸው የኢፌዴሪ ጠቅላይ ሚኒስትር ዶ/ር አብይ አህመድ ጋር የሚገናኝበት ዕድል እንድንፈጥርለት ነው። ስሙ ራያን ሻሚ ይባላል። የተወለደው በካናዳ ነው። ዕድሜው ስምንት ሲሆን ሴንት ማቲው-ኬሲ ሬብልስ ለሚባል የሆኪ ቡድን በአጥቂ ስፍራ በመጫወት ላይ ይገኛል። በተያዘው የፈረንጆች አመት 2019 በክዊካርድ የኤድመንተን ታዳጊዎች የሆኪ ሳምንት የወርቅ ሜዳልያ ከተሸለሙ ስምንት ታዳጊ ወጣቶች መካከል አንዱ ነው። ራያን ትልዕቅ ህልም ያለው ልጅ ነው። ህልሙ እንደሚሳካለትም አናምናለን። ባይወለድባትም የወላጆቹ ሀገር ለሆነችው ኢትዮጵያ ጥልቅ ፍቅር አለው። መሪዋን ጠቅላይ ሚኒስትር ዶ/ር አብይ አህመድንም በጣም ከማድነቁም በላይ በቡድናቸው መጽሔት ላይ አርአያው እንደሆኑ ገልጿል። ገና በታዳጊነቱ ለወላጆቹ ሃገር ከፍተኛ ፍቅር በማሳየት ላይ የሚገኘው ይህ ልጅ በሆኪ ስፖርት ዕውቅናው እየጨመረ በሚመጣበት ወቅት ኢትዮጵያን በተሻለ ሁኔታ ማስጠራት እንደሚጀምር አያጠያይቅም።