News

Previous Next

በውጭ የሚኖሩ ኢትዮጵያውያንና ትውልደ ኢትዮጵያውያን በኤምባሲዎች አስተባባሪነት ወገኖቻቸውን ለመደገፍና ለማቋቋም የሚሆን ገንዘብ ማሰባሰባቸው የሚያስመሰግን ብቻ ሳይሆን የተቀደሰም ተግባር እንደሆነ ክቡር ምክትል ጠቅላይ ሚኒስትርና የውጭ ጉዳይ ሚንስትር አቶ ደመቀ መኮንን ገለጹ፡፡
ክቡር ምክትል ጠቅላይ ሚኒስትርና የውጭ ጉዳይ ሚንስትሩ ይህን መልዕክት ያስተላለፉት በቅርቡ ከተለያዩ የሃገሪቱ ክፍሎች የተፈናቀሉ ሰላማዊ ዜጎችን ለመደገፍ በዩናይትድ ኪንግደም ለሦስት ሳምንታት ሲካሄድ የቆየው የበይነ መረብ የገቢ ማሰባሰበያ ዝግጅት ማጠናቀቂያ መርሃ ግብር ላይ ነው፡፡ ክቡር ሚኒስትሩ አክለውም መንግስት ላለፉት ሁለት አመታት ዘርፈ ብዙ የሪፎርም ሂደት ውስጥ መግባቱን አስታውሰው በሌላ በኩል ደግሞ መንግስት በፖለቲካ በማህበራዊ እና በኢኮኖሚ ዘርፍ እያካሄደ ያለው ሪፎርም ባልተዋጠላቸው የውስጥና የውጭ አካላት ቅንብር በተገመደ ሴራ ህዝባችን ለችግርና ለጥፋት ሲዳረግ መቆየቱን ጠቅሰዋል፡፡
በቅርቡም በህወሓት ጁንታ የሰሜኑን የአገራችንን ክፍል ሉኣላዊነት በማስከበር ላይ በሚገኘው የሀገር መከላከያ ሰራዊት ላይ በውድቅት ሌሊት የተፈፀመው ኢሰብኣዊ ድርጊት መላውን ህዝባችንን ያስቆጣ እኩይ ተግባር መሆኑን አንስተው፣ መንግስት ይህን ዘግናኝ ድርጊት በፈፀሙ የክህደት ሃይሎች ላይ እርምጃ በመውሰድ የህግ ማስከበርና ሃገርን የመታደግ ተግባር አከናውኗል ብለዋል፡፡ በተደረገው ሁለገብ ርብርብም ጁንታው ፈጽሞ በማያገግም መልኩ ግብአተ መሬቱ መጠናቀቁና ርዝራዦቹም በቁጥጥር ስር እየዋሉ መሆኑን ተናግረዋል፡፡ በዚህ ህግ የማስከበር ሂደት በሰሜኑ የአገራችን ክፍልና በሌሎች አካባቢዎች የሚገኙ ወገኖች በፀረ ሰላም ሀይሉ በተነዛው ሀሰተኛ ፕሮፓጋንዳና ሆን ተብሎ በዚህ ሀይል በተፈጠሩ ግጭቶች ወገኖቻችን ከቤት ንብረተቸው መፈናቀላቸውንና ለስደት መዳረጋቸውንም ገልጸዋል፡፡
ክቡር ሚኒስትሩ በመልዕክታቸው በዩናይትድ ኪንግደም የሚገኙ ኢትዮጵያዊያንና ትውልደ ኢትዮጵያዊያን ለመከላከያ ሰራዊታችን ከዚህ ቀደም ካበረከቱት ከፍተኛ የገንዘብ ድጋፍ በተጨማሪ ተፈናቃይ ዜጎቻችንን ለማቋቋም እያደረጉ ላለው ድጋፍ ምስጋናቸውን አቅርበው፣ መንግስት የጀመራቸውን ሪፎርሞች ተግባራዊ ለማድረግ አስፈላጊ የሆነውን የውጭ ምንዛሪ ችግር ለመቅረፍ ዳያስፖራው ገንዘብ በህጋዊ መንገድ ወደሀገር ውስጥ በመላክ የጥቁር ገበያን የገንዘብ ዝውውርን ለማምከን በሚደረገው ጥረት የበኩሉን ሚና እንዲጫወት ጥሪ አቅርበዋል፡፡
በሌላም በኩል የውጭ ጉዳይ ሚኒስትር ዴኤታ ክብርት ወ/ሮ ብርቱካን አያኖ በወቅቱ ባስተላለፉት መልዕክት በዩናይትድ ኪንግደም ነዋሪ የሆኑ ኢትዮጵያውያንና ትውልደ ኢትዮጵያውያን ቀደም ሲል ሀገራቸውን ለመደገፍ የገንዘብ ፣ የእውቀት እና የቴክኖሎጂ ሽግግር በማድረግ ከፍተኛ አስተዋጽኦ ማድረጋቸውን ጠቅሰው፣ አሁንም የተፈናቀሉ ወገኖቻችንን ለመርዳት ለሚያደርጉት የገንዘብ ማሰባሰብ ጥረት ምስጋናቸውን አቅርበዋል፡፡
የኢትዮጵያ ዳያስፖራ ኤጀንሲ ዋና ዳይሬክተር ክብርት ወ/ሮ ሰላማዊት ዳዊትም በበኩላቸው የዳያስፖራውን ሁለንተናዊ ተሳትፎ ማሳደግ እንዲቻል መንግስት የዳያስፖራ ኤጀንሲን ማቋቋሙን ጠቅሰው፣ ኤጀንሲውም ከሴክተር ተቋማት ጋር በመቀናጀት የዳያስፖራውን ተሳትፎ ማሳደግ የሚያስችሉ ተግባራትን በትኩረት በማከናወን ላይ እንዳለ ገልጸዋል፡፡ ቅንጅታዊ አሰራሩም ዳያስፖራው የሀገሩን እድገትና ብልፅግና ለማፋጠን የበኩሉን ሚና እንዲጫወት ምቹ ሁኔታ መፍጠሩን አስገንዝበዋል፡፡ ክብርት ዋና ዳይሬክተሯ አክለውም ዳያስፖራው ልዩ ልዩ ሃገራዊ ፕሮጀክቶችን ለመደገፍ እያሳየ ስላለው የተጠናከረ ተሳትፎ አመስግነው፣ ይኽው መልካም ተግባር ተጠናክሮ ሊቀጥል እንደሚገባ ገልጸዋል።
በዩናይትድ ኪንግደም የኢፌዴሪ አምባሳደር ክቡር ተፈሪ መለሰ ዳያስፖራው ሪፎርሙን በመደገፍ ከኤምባሲው ጋር በቅርበት እየሰራ መሆኑን ጠቅሰው፣ ለሀገራችን ብሄራዊ ጥቅሞች መከበርና ለወቅታዊ ጥሪዎች ምላሽ ለመስጠት በዳያስፖራው የተከናወኑ ተግባራትን በዝርዝር አቅርበዋል፡፡
የኢትዮጵያውያን ግብረ ሀይል በዩናይትድ ኪንግደም አስተባባሪ አቶ ዘላለም ተሰማም በበኩላቸው ዳያስፖራው የተጀመረውን ሪፎርም ለመደገፍ አቅሙ የሚፈቅደውን ሁሉ ለማድረግ ዝግጁ መሆኑን መግለጻቸውን ከእንግሊዝ የኢፌዴሪ ኢምባሲ ያገኘነው መረጃ ያሳያል፡፡
Previous Next

በአውስትራሊያ የኢፌዴሪ ኤምባሲ እንዲሁም በአውስትራሊያና ኒውዝላንድ የኢትዮጵያ ዳያስፖራ የማኅበረሰብ አባላት አስተባባሪነት ‘ለሃገር ሞታችኋል፤ ምስጋና ያንሳችኋል’ በሚል መሪ ሃሳብ ለኢፌዴሪ የሃገር መከላከያ ሠራዊት ምሥጋና የሚያቀርብ የበይነ መረብ ውይይት ተካሄደ፡፡
በውውይቱ ላይ የኢፌዴሪ የውጭ ጉዳይ ሚኒስቴር ሚኒስትር ደኤታ ክብርት አምባሳደር ብርቱካን አያኖ፣ የአገር መከላከያ ሠራዊት ሚኒስትር ደኤታ ክብርት ወ/ሮ ማርታ ሉዊጊ፣ የኢትዮጵያ ዳያስፖራ ኤጄንሲ ዋና ዳይሬክተር ክብርት ወ/ሮ ሰላማዊት ዳዊትና የመከላከያ ሠራዊት ዘመቻ መምሪያ ኃላፊ ብርጋዲየር ጄኔራል ተስፋዬ አያሌው በተጋባዥ እንግድነት ተገኝተዋል።
በወቅቱም ክብርት አምባሳደር ብርቱካን አያኖ በአውስትራሊያና ኒውዝላንድ የሚኖሩ የኢትዮጵያ ዳያስፖራ የማኅበረሰብ አባላት ለሃገራዊ ፕሮጀክቶችና ወቅታዊ ጥሪዎች እየሰጡ ስላሉት ምላሽና ዘርፈ ብዙ ተሳትፎ ምስጋናቸውን አቅርበዋል፡፡ የኢትዮጵያ ዳያስፖራ ኤጄንሲ ዋና ዳይሬክተር ወ/ሮ ሰላማዊት ዳዊትም በበኩላቸው የኢትዮጵያ ዳያስፖራ ኤጄንሲ መቋቋም የኢትዮጵያ መንግሥት ለዜጋ ተኮር ዲፕሎማሲ የሰጠው ትኩረት ማሳያ መሆኑን አንስተው፣ ዳያስፖራው አንድነቱን ለመጠበቅና በልማት ስራዎች ላይ በጋራ ለመቆም የጀመራቸውን ስራዎች አጠናክሮ መቀጠል እንዳለበት ገልጸዋል። የሃገር መከላከያ ሠራዊት የዘመቻ መምሪያ ኃላፊ ብርጋዲየር ጄኔራል ተስፋዬ አያሌውም የህብረተሰቡ ድጋፍ ለሠራዊቱ ስንቅ ሆኖ ግዳጁን በብቃት እንዲወጣ እንዳስቻለው ገልጸው፣ ዳያስፖራው እያደረገ ስላለው ድጋፍ ምስጋናቸውን አቅርበዋል።
በአውስትራሊያና ኒውዝላንድ የሚገኙ ኢትዮጵያውያን ማኅበረሰብ አባላትን በመወከል የቪክቶሪያ ኢትዮጵያውያን ማኅበረሰብ ማኅበር ፕሬዚደንት አቶ ተስፋዬ እንደሻው ዳያስፖራው በባሕር ማዶ ቢኖርም ኢትዮጵያዊነቱ አለመቀነሱን ገልጸው፣ ለማሳያነትም የማኅበረሰብ አባላቱ ለኮሮና ቫይረስ ወረርሽኝ መከላከያ፣ ለሕዳሴ ግድብ ግንባታና ለአገር መከላከያ ሠራዊት መርጃ ያበረከቱትን የገንዘብና የሙያ አስተዋፅኦዎች በዝርዝር አቅርበዋል። በተጨማሪም የሀገር መከላከያ ሰራዊትን ጀግንነትና ኢትዮጵያዊነትን የሚያሞግሱ ልዩ ልዩ ስነ-ግጥሞችና የሙዚቃ ስራዎችም ቀርበዋል፡፡
በመድረኩ ላይ ጥፋተኞች ለፍርድ ስለሚቀርቡት መንገድ፣ ሕወሓት አሸባሪ ተብሎ ለምን እንዳልተፈረጀ፣ ከወቅታዊ ሃገራዊ ሁኔታዎች አንጻር ምርጫን እንዴት ማካሔድ እንደሚቻል፣ የሕግ ማስከበር እርምጃው ያለበት ደረጃ እንዲሁም የልዩ ኃይልን የወደፊት ዕጣ ፈንታ የተመለከቱ ጥያቄዎች ቀርበው በክቡራን የስራ ሃላፊዎቹ ተገቢው ምላሽና ማብራሪያዎች ተሰጥቶባቸዋል፡፡
በመድረኩ ማጠቃለያ ላይ ለሃገር መከላከያ ሰራዊትና በግጭቱ ለተጎዱ የህብረተሰብ ክፍሎች ድጋፍ የገቢ ማሰባሰቢያ መርሃ ግብር ተካሂዷል፡፡
Previous Next

‘ኢትዮጵያ ትቀጥላለች’ (Ethiopia Shall Continue) በሚል መሪ ሃሳብ ላይ ያተኮረና ከፍተኛ የመንግስት ሃላፊዎች፣ አምባሳደሮች፣ ታዋቂ ግለሰቦችና የዳያስፖራ አባላት የተሳተፉበት የበይነ መረብ ውይይት ተካሄደ።
በውይይት መድረኩ ላይ ተሳታፊ የነበሩት የኢትዮጵያ ዳያስፖራ ኤጀንሲ ም/ዋና ዳይሬክተር አቶ መሐመድ እንድሪስ ባስተላለፉት መልዕክት መድረኩን ላመቻቸውና በአሜሪካን ሃገር በኢትዮጵያውያንና ትውልደ ኢትዮጵያውያን ለተመሰረተው ‘ኢትዮጵያ ትቀጥላለች’ ለተባለው ድርጅት ምስጋናቸውን አቅርበዋል። አክለውም ‘ኢትዮጵያ ትቀጥላለች’ የሚለው እሳቤ የግዛት ቀጣይነትን ብቻ ሳይሆን የሃገረ መንግስትና የተቋማት እንዲሁም ማህበረሰቡን ያስተሳሰሩት እሴቶች ተጠብቆ መቆየትን የሚያሳይ እሳቤ መሆኑን አንስተዋል። ም/ዋና ዳይረቴክተሩ በመልዕክታቸው ማጠቃለያ በውጭ የሚኖሩ ኢትዮጵያውያንና ትውልደ ኢትዮጵያውያን ለሃገራዊ አንድነትና ለሃገራዊ ትልሞች መሳካት እያከናወኑ ስላለው አዎንታዊ አስተዋጽኦ ምስጋናቸውን አቅርበው፣ ኤጀንሲው ከዚህ አንጻር ዳያስፖራው የሚፈልጋቸውን ድጋፎች ለማድረግ ዝግጁ መሆኑን ገልጸዋል።
በመድረኩ ላይ ድርጅቱ ለሀገር መከላከያ ሰራዊትና ለተጎዱ ወገኖች ድጋፍ የሚውል 15 ሺህ የአሜሪካን ዶላር ድጋፍ ማድረጉም ታውቋል።
Previous Next

በደቡብ አፍሪካ የኢፌዴሪ ኤምባሲ የዳያስፖራ አገልግሎት ለሚሰጡ ዲፕሎማቶችና የአይሲቲ ባለሙያዎች የዳያስፖራ መረጃን ለማጠናቀር እንዲያገለግል ከዚህ ቀደም ተዘጋጅቶ አገልግሎት ላይ ሳይውል በቆየውና በኢትዮጵያ ዳያስፖራ ኤጀንሲ እንዲሁም አሜሪካን ሃገር በሚገኙ የዘርፉ ባለሙያዎች በተሻሻለው የዳያስፖራ መረጃ ማጠናቀሪያ ዳታቤዝ ላይ በበይነ መረብ ስልጠና ተሰጠ፡፡
በስልጠናው መክፈቻ ላይ የኤጀንሲው ዋና ዳይሬክተር ክብርት ወ/ሮ ሰላማዊት ዳዊት ባስተላለፉት መልዕክት የዳያስፖራ መረጃን ማደራጀት ለኤጀንሲው ከተሰጡት ዋና ዋና ተግባርና ሃላፊነቶች መካከል አንዱ መሆኑን አንስተው፣ የመረጃ ማጠናቀሪያ ዳታቤዙን ወደስራ ለማስገባት ኤጀንሲው የሄደባቸውን ሂደቶች በዝርዝር አቅርበዋል፡፡ ክብርት ዋና ዳይሬክተሯ አክለውም ዳታቤዙ በቅድሚያ በክላስተር አስተባባሪ ሚሲዮኖች ከተሞከረ በኋላ ወደ ተግባር የሚገባ መሆኑን ገልጸዋል፡፡
የዳያስፖራ መረጃ ማጠናቀሪያ ዳታቤዝ አስፈላጊነትና ጠቀሜታን በተመለከተ በኤጀንሲው እንዲሁም የመረጃ ማጠናቀሪያ ዳታቤዙን አጠቃቀም በተመለከተ በአሜሪካን ሃገር በማይክሮሶፍት ኩባንያ ከፍተኛ የኮምፒዩተር ፕሮግራመር በሆኑት አቶ ደነቀው ጀምበሬ አማካኝነት የበይነ መረብ የተግባር ስልጠና ተሰጥቷል፡፡ ሰልጣኞች ላነሷቸው ጥያቄዎችም ምልሾችና ማብራሪያዎች ቀርበዋል፡፡
በደቡብ አፍሪካ የኢፌዴሪ ኤምባሲ ም/ሚሲዮን መሪ የሆኑት ክቡር አቶ ሙሉጌታ ውለታው በስልጠናው ማጠቃለያ ላይ ባቀረቡት የመዝጊያ መልዕክት ከተጣበበ ጊዜያቸው ላይ መስዋዕት አድርገው ስልጠናውን ለሰጡትና ዕውቀታቸውን በበጎ ፈቃድ በማካፈል ላይ ያሉትን ትውልደ ኢትዮጵያዊውን አቶ ደነቀው ጀምበሬን አመስግነው፣ በተሰጠው የአቅም ግንባታ ስራ ላይ በመመስረት በቅድሚያ በሚሲዮናቸው ቀጥሎም ሚሲዮኑ በሚያስተባብራቸው ሚሲዮኖች ዳታቤዙን ወደ ስራ በማስገባት የተሻለ የዳያስፖራ መረጃ እንዲደራጅ ለማድረግ ዝግጁ መሆናቸውን ገልጸዋል፡
Previous Next

በዱባይና ሰሜን ኤመሬቶች የሚገኙ ልዩ ልዩ የዳያስፖራ ማህበራትን በአንድ ጥላ ስር የሚያሰባስብ ህብረትን መመስረት የሚያስችል አደራጅ ኮሚቴ ተቋቋመ፡፡
በኮሚቴ ምስረታው ወቅት በክብር እንግዳነት የተገኙት የኢትዮጵያ ዳያስፖራ ኤጀንሲ ዋና ዳይሬክተር ክብርት ወ/ሮ ሰላማዊት ዳዊት ባስተላለፉት መልዕክት በልዩ ልዩ የዓለም ክፍሎች የሚኖሩ ኢትዮጵያውያንን ያሰባሰቡ በርካታ አደረጃጀቶች መኖራቸውንና እነዚሁ ማህበራት ባሉበት ሁኔታ እያከናወኑ ያሉት ስራ የሚበረታታ መሆኑን አንስተው፣ ለተሻለ ውጤታማነት ግን አደረጃጀቶቹ ህልውናቸውን በጠበቀ ሁኔታ በአንድ ጥላ ስር መሰባሰባቸው አዋጭ መሆኑን የሃገራት ተሞክሮ እንደሚያሳይ ምሳሌዎችን በመጥቀስ አስረድተዋል፡፡
በወቅቱም በዱባይና ሰሜን ኤመሬቶች የኢፌዴሪ ቆንስላ ጀነራል ክብርት አምባሳደር ኢየሩሳሌም አምደማርያም በቆንስላው የማህበራት አደረጃጀት ያለበትን ሁኔታና ከሚቋቋመው ህብረት የሚጠበቀውን ሚና ያቀረቡ ሲሆን፣ ሚሲዮናቸው ለማህበራቱም ሆነ ለሚቋቋመው ህብረት ቢሮ ከማመቻቸት ጀምሮ አስፈላጊውን ሁሉ ድጋፍ ለማድረግ ዝግጁ መሆኑን ገልጸዋል፡፡
በመድረኩ ላይ ልዩ ልዩ አደረጃጀቶችን ወክለው ለተገኙ ተሳታፊዎች የማህበራት ህብረት አመሰራረት ሂደትና ጠቀሜታን በተመለከተ ለመነሻ የሚሆን ጽሑፍ ቀርቧል፡፡ በቀረበው ጽሁፍ እንዲሁም በህብረት ምስረታው ሂደት ላይ ከተሳታፊዎች ለተነሱ ሃሳቦች ከመድረክ ምላሽ ተሰጥቷል፡፡
ተሳታፊዎች ባነሱት ሃሳብም የህብረት ምስረታውን ለረዥም ጊዜ ሲጠብቁት የነበረ መሆኑንን፣ የህብረት ምስረታው በተናበበና በተቀናጀ ሁኔታ እንዲሰሩ በማድረግ አቅማቸውን እንደሚያስተባብርላቸው፣ የጋራ ዓላማ፣ ግብና ዕቅድ አውጥተው በውጤታማነት እንዲንቀሳቁ እንደሚያስችላቸውና ለዚህም ስኬታማነት ማህበራቱ የተቋቋሙበትን ዓላማ ሳይስቱ በህብረቱ ጥላ ስር የሚያንቀሳቅሳቸው የአመለካከት አንድነት ማጎልበት እንዳለባቸው ገልጸዋል፡፡ በመድረኩ ማጠቃለያም ለህብረቱ ምስረታ የሚያስፈልገውን የቅድመ ዝግጅት ስራዎች እንዲያከናውን ስድስት አበላት ያሉት አደራጅ ኮሚቴ አቋቁመዋል፡፡
በተያያዘ ዜና በተባበሩት አረብ ኤመሬቶች የሚገኘው የኢትዮጵያ ዳያስፖራ ኤጀንሲ የልዑካን ቡድን በልዩ ልዩ ምክንያት ችግር ላይ የወደቁና በዱባይና ሰሜን ኤመሬቶች ቆንስላ ጽ/ቤት ቅጥር ግቢ በተዘጋጀ ማቆያ ውስጥ ከሚገኙ ኢትዮጵያውያን ጋር ውይይት ማድረጉም ለማወቅ ተችሏል፡፡
Previous Next

በኢትዮጵያ ዳያስፖራ ኤጀንሲ ዋና ዳይሬክተር ክብርት ወ/ሮ ሰላማዊት ዳዊት የተመራ የኤጀንሲው የልዑካን ቡድን በደቡብ አፍሪካ ከሚኖሩ የዳያስፖራ ማህበራትና አደረጃጀት መሪዎች፣ የሃይማኖት አባቶች እንዲሁም የዩኒቨርሲቲ መምህራን ጋር ተወያየ፡፡
በመድረኩም በደቡብ አፍሪካ የኢፌዴሪ ባለሙሉ ስልጣን አምባሳደር ክቡር ዶ/ር ሽፈራው ተክለማርያም የእንኳን ደህና መጣችሁ መልዕክት አስተላልፈው፣ በደቡብ አፍሪካ የሚኖሩ ኢትዮጵያውያንና ትውልደ ኢትዮጵያውያን ሃገራቸውን ለመደገፍ እያደረጉ ስላለው ዘርፈ ብዙ ድጋፍ ምስጋናቸውን አቅርበዋል፡፡ የዕለቱ የክብር እንግዳና የኢትዮጵያ ዳያስፖራ ኤጀንሲ ዋና ዳይሬክተር ክብርት ወ/ሮ ሰላማዊት ዳዊትም መድረኩ በደቡብ አፍሪካ ከሚኖሩ ኢትዮጵያውያንና ትውልደ ኢትዮጵያውያን ተወካዮች ጋር በመወያየት የዳያስፖራ ማህበረሰብ ልማትና ተሳትፎ ስራዎችን ለማጠናከር ብሎም ከዚህ አንጻር እያጋጠሙ ያሉ ማነቆዎችን በመለየት መፍትሔ ለማፈላለግ መመቻቸቱን ገልጸው፣ በደቡብ አፍሪካ የሚኖሩ የዳያስፖራ ማህበረሰብ አባላት ለሃገራዊ ፕሮጀክቶችም ሆነ ወቅታዊ ጥሪዎች እያደረጉ ላሉት ድጋፍ ምስጋናቸውን አቅርበዋል፡፡
በመድረኩ ላይ በኤጀንሲው እየተከናወኑ ያሉ ዋና ዋና ስራዎችና የተገኙ ውጤቶች፣ የመደራጀት ጠቀሜታ እንዲሁም በወቅታዊ ሃገራዊ ጉዳዮች ላይ ያተኮረ ሰነድ የቀረበ ሲሆን፣ ተሳታፊዎችም ለውይይት በመነሻነት እንዲያገለግል በቀረበው ሰነድ ላይ ተመስርተው ላነሷቸው ጥያቄና አስተያየቶች ከመድረክ ምላሽ ተሰጥቶባቸዋል፡፡
ለውይይት መነሻ በቀረበው ሰነድ ላይ በመመስረት በተሳታፊዎች ከቀረቡ ሃሳቦች መካከልም በደቡብ አፍሪካ በህጋዊነት ለመኖር እንዲችሉ ከዚህ በፊት ተጀምረው የተቋረጡ የወረቀት ስራዎች ቀጥለው በህጋዊ መንገድ ገንዘብ ወደ ሃገር ቤት መላክ የሚችሉበት ሁኔታ ሊመቻችላቸው እንደሚገባ፣ በቀውስ ወቅት የፖለቲካ ልዩነትን የተሻገረና ሃገራዊ ጥቅምን ያስቀደመ አንድነት ሊፈጠር እንደሚገባ፣ ዳያስፖራው የተጀመሩ ፕሮጀክቶች እንዲጠናቀቁ ድጋፉን አጠናክሮ ለመቀጠል ዝግጁ መሆኑን፣ ከወቅታዊ ሃገራዊ ሁኔታዎች ጋር በተያያዘ በዓለም ዓቀፉ ማህበረሰብ ዘንድ እየተሰራጩ ያሉ የተሳሳቱና ጎጂ መረጃዎችን ለመመከት የዘመቻ ስራ የሚያከነውን አካል አቋቁመው በመስራት ላይ መሆናቸውን፣ ዳያስፖራውን በቤቶች ልማት ፕሮግራም ላይ ለማሳተፍ ሊሰራ እንደሚገባ፣ ህገ-ወጥ የሰዎች ዝውውርን ለመግታት የሚያስችሉ ስራዎች ተጠናክረው መቀጠል እንዳለባቸው፣ ጥምር ዜግነት የማግኘት ጉዳይ እንዲሁም ባሉበት ሆነው በሃገራዊ ምርጫ የመሳተፍ ዕድል ሊመቻችላቸው እንደሚገባ ማንሳታቸው የሚጠቀሱ ናቸው፡፡
Previous Next

በኢትዮጵያ ዳያስፖራ አባላት በተመሰረተውና ግሎባል አሊያንስ በተሰኘው ግብረ ሰናይ ድርጅት በተደረገ ድጋፍ ዘጠና ኢትዮጵያን ዜጎች ከሊባኖስ ወደ ሀገራቸው ገቡ፡፡
የውጭ ጉዳይ ሚኒስቴር ቆንስላ ጉዳዮች ዳይሬክቶሬት ጄኔራል ተወካይና የአለም አቀፍ የስደተኞች ተቋም (IOM) ተወካይ አዲስ አበባ ቦሌ አለም አቀፍ ኤርፖርት በመገኘት ለተመላሾች አቀባበል አድርገዋል፡፡
ግሎባል አሊያን ከዚህ በፊትም ልዩ ልዩ ድጋፎችን በማድረግ የሚታወቅ በኢትዮጵያዊያንና ትውልደ ኢትዮጵያውያን የዳያስፖራ አባላት የተመሰረተ ግብረ ሰናይ ድርጅት ሲሆን፣ በዚህ አጋጣሚ ድርጅቱ እያደረገ ላለው ድጋፍ በኤጀንሲው ስም ምስጋናችንን ማቅረብ እንወዳለን።
Previous Next

የኢ.ፌ.ዴ.ሪ. ጠ/ሚ ክቡር ዶ/ር ዐቢይ አህመድ የፈረንጆችን ገና ለሚያከብሩ የኢትዮጵያ ወዳጆችና የዳያስፖራ ማህበረሰብ አባላት የእንኳን አደረሳችሁ መልዕክት አስተላለፉ፡፡
በዚህ አጋጣሚ የኢትዮጵያ ዳያስፖራ ኤጀንሲም በመላው ዓለም ለምትገኙና በዓሉን ለምታከብሩ ኢትዮጵያውያንና ትውልደ ኢትዮጵያውያን መልካም የገና በዓል እንዲሆንላችሁ ይመኛል፡
Previous Next

በአቡዳቢና ዱባይ ሚሲዮኖች የዳያስፖራ አገልግሎት ለሚሰጡ ዲፕሎማቶችና የአይሲቲ ባለሙያዎች የዳያስፖራ መረጃን ለማጠናቀር እንዲያገለግል ከዚህ ቀደም በውጭ ጉዳይ ሚኒስቴር ተዘጋጅቶ አገልግሎት ላይ ሳይውል በቆየውንና በኢትዮጵያ ዳያስፖራ ኤጀንሲ እንዲሁም አሜሪካን ሃገር በሚገኙ የዘርፉ ባለሙያዎች በተሻሻለው የዳያስፖራ መረጃ ማጠናቀሪያ ዳታቤዝ ላይ ስልጠና ተሰጠ፡፡
የስልጠና መድረኩን በንግግር የከፈቱት የኤጀንሲው ዋና ዳይሬክተር ክብርት ወ/ሮ ሰላማዊት ዳዊት ባስተላለፉት መልዕክት የዳያስፖራ መረጃን ማደራጀት ለኤጀንሲው ከተሰጡት ተግባርና ሃላፊነቶች መካከል አንዱ መሆኑን ጠቅሰው፣ የዳያስፖራ መረጃ ማጠናቀሪያ ዳታቤዙም ይህንን ዓላማ ለማሳካት መዘጋጀቱን ገልጸዋል፡፡ ክብርት ዋና ዳይሬክተሯ አክለውም የስልጠናው ተሳታፊ ዲፕሎማቶች ከስልጠናውን የሚያገኙትን ክህሎትና የመረጃ ማጠናቀሪያ ዳታቤዙ የሚፈጥርላቸውን ዕድል ተጠቅመው የዳያስፖራውን መብትም ለማስከበርም ሆነ ተሳትፎውን በማሳደግ ረገድ ወሳኝ የሆነውን መረጃ በጥራት እንዲሰበስቡ አሳስበዋል፡፡
በዕለቱም የዳያስፖራ መረጃ ማጠናቀሪያ ዳታቤዝ አስፈላጊነትና ጠቀሜታን በተመለከተ በኤጀንሲው በኩል ገለጻ የቀረበ ሲሆን፣ በአሜሪካን ሃገር በማይክሮሶፍት ኩባንያ ከፍተኛ የኮምፒዩተር ፕሮግራመር በሆኑት አቶ ደነቀው ጀምበሬ አማካኝነት የመረጃ ማጠናቀሪያ ዳታቤዙን አጠቃቀም በተመለከተ የበይነ መረብ የተግባር ስልጠና ተሰጥቷል፡፡ ሰልጣኞች ላነሷቸው ጥያቄዎችም ምልሾችና ማብራሪያዎች ቀርበዋል፡፡
ሰልጣኞች በሰጡት አስተያየት በስልጥናው ክህሎታቸውን ከማዳበራቸውም በላይ ከዚህ በፊት በተበታተነ መልኩ ያሰባስቡ የነበረውን የዳያስፖራ መረጃ በተደራጀ መልኩ የሚያጠናቅር ዳታቤዝ መዘጋጀቱ ለስራቸው ቅልጥፍና የሚያግዝ መሆኑን ገልጸዋል፡፡
በስልጠናው ማጠቃለያ ላይ በዱባይና ሰሜን ኤመሬቶች የኢፌዴሪ ቆነስላ ጀነራል ክብርት አምባሳደር ኢየሩሳሌም አምደማሪያም ዕውቅታቸውንና ጊዜያቸውን ሳይሰስቱ የተግባር ስልጥናውን የሰጡትንና ከዳታቤዙ ዝግጅት ጋር በተያያዘ ድጋፍ እያደረጉ ያሉትን አቶ ደነቀው ጀምበሬን አመስግነው፣ በሚሲዮናቸውና በክላስተሩ ዳታቤዙን ለመጠቀም በትጋት እንደሚሰሩ ገልጸዋል፡
Previous Next

በኤጀንሲው ም/ዋና ዳይሬክተር አቶ መሐመድ እንድሪስ የተመራው የኢትዮጵያ ዳያስፖራ ኤጀንሲ የልዑካን ቡድን በሳኡዲ አረቢያ ባደረገው ጉዞ ሪፖርት ላይ ውይይት በማካሄድ በሪፖርቱ ግኝቶች ላይ በኤጀንሲውና በሚመለከታቸው አካላት ተወስደው ሊሰራባቸው በሚገቡ ጉዳዮች ላይ የመፍትሔ ሐሳቦች ተመላከቱ።
በውይይቱ ወቅት የልዑካን ቡድኑ በጂዳ፣ ሪያድና አካባቢው ከህዳር 25 እስከ ታህሳስ 7 ቀን 2013 ዓ.ም ድረስ ያካሄደው ምልከታና የጉብኝት ሪፖርት ቀርቧል። በሪፖርቱም በሳኡዲ አረቢያ የሚገኙ ዜጎቻችን ያሉበት ሁኔታ፣ በአስቸጋሪ ሁኔታ ውስጥ ያሉ ዜጎች ደወ ሃገራቸው ስለሚመለሱበት መንገድ እንዲሁም በሃገሪቱ የሚገኘውን የዳያስፖራ ማህበረሰብ ተሳትፎ ማሳደግ በሚቻልበት ሁኔታ ላይ በሳኡዲ አረቢያ ከሚገኙ ኢትዮጵያውያን፣ ከሚሲዮን መሪዎችና ከሳኡዲ አረቢያ መንግስት ከፍተኛ ሃላፊዎች ጋር የተከናወኑ ስራዎች ቀርበዋል።
በቀረበው ሪፖርት ላይ በተደረገው ውይይትም በሳኡዲ አረቢያ በአስቸጋሪ ሁኔታ ውስጥ ያሉ ዜጎች ጉዳይ አፋጣኝ መፍትሔ የሚፈልግ ስለመሆኑ፣ ለችግሩ መነሻ የሆነው ሕገ-ወጥ የሰዎች ዝውውርን ከምንጩ ለማድረቅ እንደ ሃገር ስትራቴጂያዊ እቅድ ተነድፎ መሰራት እንዳለበት፣ ከሳኡዲ አረቢያ መንግሰት ጋር ለተፈረሙ የሰራተኛና የደህንነት ስምምነቶች ተፈጻሚነት ትኩረት ሰጥቶ መስራት እንደሚያስፈልግ የሚገልጹ ሃሳቦች ተንጸባርቀዋል።
የውይይት መድረኩን የመሩት የኤጀንሲው ዋና ዳይሬክተር ክብርት ወ/ሮ ሰላማዊት ዳዊት ባስተላለፉት የማጠቃለያ መልዕክትም የልዑካን ቡድኑ ስላከናወነው አመርቂ ስራ የቡድን መሪውንና አባላቱን አመስግነው፣ በሪፖርቱ ውስጥ ከዜጎች መብትና ጥቅም እንዲሁም ከሳኡዲ አረቢያ መንግስት ጋር የተፈረሙ ስምምነቶች አፈጻጸምን በተመለከተ የተነሱ ሃሳቦች በመንግስት ውሳኔ እንዲሰጥባቸው ለብቻቸው ተለይተው እንዲቀርቡ አቅጣጫ አስቀምጠዋል። ከዳያስፖራ ተሳትፎ ጋር የተያያዙና ኤጀንሲውን የሚመለከቱ ተግባራት ደግሞ ተለይተው ለሚመለከታቸው የስራ ክፍሎች እንዲቀርቡና መፍትሔ እንዲበጅላቸው አሳስበዋል።
Previous Next

በኢትዮጵያ ዳያስፖራ ኤጀንሲ ዋና ዳይሬክተር ክብርት ወ/ሮ ሰላማዊት ዳዊት የተመራ የኤጀንሲው የልዑካን ቡድን በአቡዳቢ ከሚኖሩ የዳያስፖራ ማህበራትና አደረጃጀት መሪዎች ጋር ተወያየ፡፡
በመድረኩ ላይ የእንኳን ደህና መጣችሁ መልዕክት በአቡዳቢ የኢፌዴሪ ባለሙሉ ስልጣን አምባሰደር ክቡር ሱለይማን ደደፎ የተላለፈ ሲሆን፣ ክቡር አምባሳደሩም በመልዕክታቸው በአቡዳቢ የሚኖሩ ኢትዮጵያውያን ሃገራዊ ፕሮጀክቶችን ከመደገፍ በተጨማሪ ሚሲዮኑ በሚገኝበት አካባቢ ችግር ላይ የወደቁ ዜጎችን ለመርዳት እያደረጉ ስላለው መጠነ ሰፊ ድጋፍና ኢትዮጵያዊ የትብብር መንፈስ ምስጋናቸውን አቅርበዋል፡፡ የዕለቱ የክብር እንግዳና የኢትዮጵያ ዳያስፖራ ኤጀንሲ ዋና ዳይሬክተር ክብርት ወ/ሮ ሰላማዊት ዳዊትም በበኩላቸው ኤጀንሲው በዳያስፖራውና በሃገር ቤት መካከል አገናኝ ድልድይ ሆኖ እንዲሰራ መቋቋሙን ገልጸው፣ በተባበሩት አረብ ኤመሬቶች በአጠቃላይ በተለይም በአቡዳቢ የሚኖሩ የዳያስፖራ ማህበረሰብ አባላት ለሃገራዊ ፕሮጀክቶችና ወቅታዊ ሃገራዊ ጥሪዎች እየሰጡ ስላሉት አበረታች ምላሽ አመስግነዋል፡፡ ክብርት ዋና ዳይሬክተሯ አክለውም ይኸው ድጋፍ ተጠናክሮ መቀጠል እንዳለበት አሳስበዋል፡፡
በመድረኩም ለውይይት መነሻ የሚሆንና በኤጀንሲው እየተከናወኑ ያሉ ዋና ዋና ስራዎችና የተገኙ ውጤቶች፣ ዳያስፖራው በመደራጀቱ የሚያገኛቸው ጥቅሞች እንዲሁም በወቅታዊ ሃገራዊ ጉዳዮች ላይ ያተኮረ ሰነድ የቀረበ ሲሆን፣ ተሳታፊዎችም በሰነዱ ላይ ተመስርተው ላነሷቸው ጥያቄና አስተያየቶች ከመድረክ ምላሽ ተሰጥቶባቸዋል፡፡
ተሳታፊዎች ካነሷቸው ሃሳቦች መካከልም መድረኩ በመመቻቸቱና ስለሃገራቸው ሃሳባቸውን እንዲያካፍሉ ዕድሉን በማግኘታቸው መደሰታቸውን፣ መንግስት ያካሄደውን የህግ ማስከበር ስራ እንደሚደግፉና አስፈላጊውን ሁሉ ለማድረግ ዝግጁ መሆናቸውን፣ በህገ ወጥ መንገድ ገንዘብ መላክ ያለውን አሉታዊ ውጤት ለማስቀረት ዳያፖራው ገንዘቡን ወደ ሃገር ቤት በህጋዊ መንገድ መላክ የሚያስችሉ አሰራሮችና ማበረታቻዎች መመቻቸት እንዳለባቸው፣ ህገ ወጥ የዜጎች ዝውውርን የሚያበረታቱና ከሙስና ጋር የተያያዙ አሰራሮችን ተከታትሎ ማረምና የተጀመሩ ህጋዊ አሰራሮችንም ወደ ተግባር ማስገባት እንደሚያስፈልግ እንዲሁም ዳያስፖራው ወደ ሃገሩ ተመልሶ አቅሙ በሚፈቅደው መሰረት ተሳትፎ ማድረግ እንዲችል ምቹ ሁኔታዎች ሊፈጠሩለት ይገባል የሚሉት ይጠቀሳሉ፡፡
Previous Next

የኢትዮጵያ ዳያስፖራ ኤጀንሲ ዋና ዳይሬክተር ክብርት ወ/ሮ ሰላማዊት ዳዊት ከአሜሪካን ሃገር ከመጡና የአውትሪች ቴክኖሎጂ ድርጅት ባለቤት ከሆኑት ትውልደ ኢትዮጵያዊው አቶ ዳኛቸው ተሾመ ጋር የዕውቀት ዳያስፖራውን ተሳትፎ ማሳደግ በሚቻልባቸው ሁታዎች ላይ ተወያዩ።
በውይይቱ ወቅት አቶ ዳኛቸው ተሾመ በአሜሪካን ሃገር ለ42 ዓመታት መኖራቸውንና በኢንፎርሜሽን ኮሙዩኒኬሽን ቴክኖሎጂ ዘርፍ ተሰማርተው በመስራት ላይ እንደሚገኙ አንስተው፣ በአካል ርቀው ቢገኙም ባሉበት ሆነው የሃገራቸውን ጥቅም የሚያስከብሩ በርካታ ስራዎችን በማከናወን ላይ እንዳሉ ገልጸዋል። ከነዚህም መካከል በግጭት ቀስቃሽና በጥላቻ ላይ የተመሰረተ ንግግር በማድረግ በሀገር ውስጥ ረብሻ እንዲፈጠርና መረጋጋት እንዳይኖር የሚሰሩ የዳያስፖራ አባላትን በመለየት ተጠያቂ የሚያደርጓቸውን መረጃዎች ማሰባሰብ፣ በታላቁ የኢትዮጵያ ህዳሴ ግድብ ላይ የኢትዮጵያን ብሔራዊ ጥቅም የሚያስከብሩ የአድቮኬሲና የፐብሊክ ዲፕሎማሲ ስራዎች ማከናወን የሚገኙበት ሲሆን፣ ወደ ፊት ደግሞ ሙያቸውን ተጠቅመው በኢንፎርሜሽን ኮሙዩኒኬሽን ቴክኖሎጂ ዘርፍ በፍላጎት ላይ የተመሰረተ የአቅም ግንባታ ስልጠና ለመስጠት እንዳቀዱ ገልጸዋል። አክለውም በአሜሪካን ሃገር እሳቸውን የመሰሉ ለኢትዮጵያ ዕድገት ከፍተኛ ፋይዳ ያለው ዕውቀትና ተሞክሮ ያላቸውና ሃገራቸውን ለመርዳት ዝግጁ የሆኑ በርካታ የዳያስፖራ ማህበረሰብ አባላት መኖራቸውን አንስተዋል።
የኢትዮጵያ ዳያስፖራ ኤጀንሲ ዋና ዳይሬክተር ክብርት ወ/ሮ ሰላማዊት ዳዊትም ግለሰቡ ላሳዩት የሃገር ተቆርቋሪነት ስሜትና እያበረከቱት ስላለው አዎንታዊ አስተዋጽኦ ምስጋናቸውን አቅርበው፣ የኢትዮጵያ ዳያስፖራ ኤጀንሲም በየሚሲዮኖቹ በተመደቡ የዳያስፖራ ጉዳይ አስተባባሪ ዲፕሎማቶችና የዳያስፖራ አደረጃጀቶች አማካኝነት የዳያስፖራውን ተሳትፎ ማሳደግ የሚያስችሉ በርካታ ተግባራትን በማከናወን ላይ እንዳለ ገልጸዋል። በምሳሌነትም በአሜሪካን ሃገር የተቋቋመውና ከኤጀንሲው ጋር በመተባባር ልዩ ልዩ የአቅም ግንባታ ስራዎችን በማከናወን ላይ ያለውን ‘TASFA’ የተባለውን ድርጅት አንስተዋል። ዋና ዳይሬክተሯ አክለውም ኤጀንሲው ዳያስፖራው ባጠቃላይ በተለይም የዕውቀት ዳያስፖራው ለሃገሩ የሚያደርገውን አስተዋጽኦ ማሳደግ የሚያስችሉ ልዩ ልዩ ስልቶችን ነድፎ በመንቀሳቀስ ላይ እንዳለ ገልጸዋል።